數據Back Test 這種理論真的有用嗎？

在某討論區有朋友問咗我一條頗有意思嘅問題，喺度同大家分享下。

有人問：「用三十年的數據去Back Test 這種理論真的有用嗎？」

我答：｢問得好！呢個問題其實我之前已經反反覆覆思考過很多次。我當然明白要一個統計結果有意義，“sample size要夠大”係其中一個重要元素，所以去統計研究類似呢啲“二三十年間只出現過十次八次嘅事件”究竟有冇意思？

我思考嘅結論係，冇錯，如果一個投資市場嘅價格係完全隨機，即俗稱嘅Random Walk（彷如一個醉酒佬亂咁行），咁當然冇意思。問題係，你信唔信投資市場係random walk？我就覺得投資市場唔同擲骰仔，係有一定嘅規律同趨勢。

點解？因為投資牽涉到人，牽涉到人性！人性有貪婪、有恐懼，恐慌時更恐慌，盲目時更盲目！ 所以一旦牽涉人性，又點可能完全隨機？除非有朝一日人類轉晒性，變得全部理性，咁我到時只會問，呢個時候股市仲有冇存在嘅價值呢？

所以結論係，因為人性嘅貪婪恐懼，股市才會有超買超賣，smart money甚至market maker才有利可圖。而我研發一系列指標同系統，就係嘗試去捕捉呢啲超買超賣嘅轉角位，或者用另一句說話講，係捕捉一啲大部份人都錯嘅時間！

當然，再老 土啲都要講句：投資唔係1+2=3嘅科學，並冇100%肯定嘅答案，亦冇必勝嘅formula！所以我唔係研究緊啲咩必勝公式，而係搵出一啲合情合理、高 勝算嘅投資時機；更重要嘅係，我嘅研究可以方便大家了解，如果在某種時機下入市，往後嘅發展多數係點嘅呢，如是者，等大家作投資佈署時能夠有所依據、知所 進退！」